"ادبی ديل"ـين آتـگئتمـَز يول­لاری   چوخ­لاری چوخ­لاريندا سوروشور چوخ­لاری نيـيه توٍرکجه يازمير. جاوابيندا دئمه­لی دير کی, چوخ­لاری چوخلو ادبی ديلچی­لرين اليندن قاچير. اينانميرسيز آشاغيداکی ميثالا باخين: بيزيم "ادبی ديل" تئوريچی­لريميز _تانری بيلير_ نه قدَر مودئرن ديلچی­ليکدن گئريـيه قالميش ديرلار. آشاغيداکی خبـَره باخساز گؤررسيز نه ساياق ديلين بولاغی گؤزه­دن بولانير, ائله­جه ده, نيـيه بو آری دورو اولان خالق ديلی کوبودلاشديقدا يئرسيزجه­سينه اؤزونو بوروشوقلانديرير. گؤرَک ادبی ديليميز بير خبـَری نه کيمی پروسئسدن سوووشدوراندان سونرا ديل قورولوشونا دولدورور. آشاغيداکی کيمی خبـَرلری گوٍنده­ليک­لرده چوخ گؤروروک آنجاق بو خبـَر نئچه ايل ايره­لی­نين خبـَرلريندن دير. "آقاماليس" آديندا بير گمی بير اؤلکه­ده توتولدو؛ نئچه گوٍندن سونرا دا بوراخيلدی. اونون بوراخيلما خبـَری بئله يازيلدی: (1-نجی قورولوش)   1. "آقاماليس گميسی" سربست بوراخيلميشدير.   اينديسه, بيز ادبی ديلچی قارداشا بئله دئييريک: "اولمازمی شووقريب بو سربست سؤزونون يئرينه تانينميش آزاد سؤزو قويولسون؟ 2-نجی قورولوش:   2. "آقاماليس گميسی" آزاد بوراخيلميشدير.   سونرا بو قارداشا دئييريک: قارداش, "بوراخيلماق" ائله "آزاد اولماق" معناسيندا دير ده! اولمازمی آزاد سؤزونو ده قوياق قيراغا: 3-جی قورولوش يارانير:   3. "آقاماليس گميسی" بوراخيلميشدير.   آخيردا دا دئييريک: "قارداش, بو گمی بيله­خره بوراخيلدی يوخسا يوخ؟" قارداش دا دئيير: "بلی, بوراخيلدی!" بيزده دئييريک: "آللاه آتاوا رحمت ائله­سين! ياز: (4-جو قورولوش)   4. "آقاماليس گميسی" بوراخيلدی.   قوی هامی باشا دوشسون ده!   ايندی, بو ايکی قورولوشو توتوشدورون! گؤرون ديل هانسی دوشونجه­دن تکلّوف­لـَنير:   1. "آقاماليس گميسی" سربست بوراخيلميشدير. يوخسا 4. "آقاماليس گميسی" بوراخيلدی.