"شاهمار" يوخسا "شاخمار"   سورغولارـجاوابلارين بوندان ايره­لی پوستوندا "شاخماق" فئعليندن آزـچوخ دانيشيلدی. ايلانين ايلگی­لنن و تهلوکه­لی آخماغينا دا "شاخماق" فئعلی­نين ايشلنمه­سينه ايشاره اولوندو. بو فئعلدن "شاخمار" صيفـَتی دوٍزه­لينير؛ نئجه کی "قيزماق" فئعليندن "قيزمار" صيفـَتی تؤره­نير و. . . بو صيفـَت ايلانا ايطلاق اولونور. کندده اوشاق­لار اؤز شوٍی­لرينی (شوٍی زويوشدورمه ياريشيندا) تعريف­له­ينده دئيه­رلر: "منيم شوٍيوم شاخمار ايلاندی شاخار!" "شاخمار" سؤزجويونون "شاخماق" فئعليندن يارانماسی چوخ آيدين و موجاديله­سيز بير مطلب دير. آنجاق "ادبی ديل" فيلولوژی پهلوان­لاری هانسی آت گئتمـَز بير يول­لا بئله بير بديهی و گوٍن کيمی آيدين بير لوغـَتی "شاهمار" ائتديک­لرينه جينـّين ده عاقلی چاتماز _بيز کی هئچ!   آرتيرمالی دير, "شاهمار" سؤزجويونو فارس ديللی ادبياتدا تاپا بيلمزسيز. چون فارس ديلينده تاپيلسا, يقين, صيفـَت اولا بيلمز بلکه "ايسم" کيمی ايشلنمه­لی دير. بوردان اونون جعلی اولدوغو بيلينير. بونون دا دئييلمه­سی لازيم دير؛ توٍرکيـيه توٍرکجه­سينده "خ" سسی اولماديغی اوٍچون طبيعی حالتده "شاخمار" سؤزو "شاهمار" يازيلير آنجاق آذربايجان ديلچی­لری­نين تؤوجيهی نه اولا بيلر گؤره­سن؟ منيم کی بئيـنيمه بير زاد چاتمير. آنجاق بيزدن دئمـَک!