"پاپاق" يوخسا "بؤرک"   "ادبی ديل" تئوری­چی­لری­نين عاغلا سيغمايان هوٍنرلری بير ايکی دئييل کی. آشاغيدا وئريلن بو دانيشيغا باخين (او تای­لی "ادبی ديل" وورغونو بير عاليم­له منيم دانيشيغيم دير!!!): _سيز نيـيه "بؤرک" سؤزونو ايشلتميرسينيز؟ _آخی "بؤرک" سؤزجويو لهجه دير. _اوتوز ميليونلوق بير جمعيت ايشلـَدن سؤز نئجه لهجه سانيلا بيلـَر؟   (تئوری جاواب وئرمه­دی!) _بونا "پاپاق" دئييلمه­لی دير! _آخی "پاپاق" بيرجوٍر بؤرک دير. بوٍتون بؤرک­لره دئييله بيلمـَز! ايندی عوٍمومی بير آد آختارساق نئيله­مه­ليـييک؟ _اوندا ايسه ادبی ديلده "کولاه" دئـيه­ريک! _. . . . . . .   دوغرودان دا _مرحوم موستجاب­الدعوه دئميشکن_ "فئيض آپارمالی" دير. مين ايل ايره­لی "ديوان لغات الترک"-ده وئريلميش اون­لارجا ميليونلوق بير جمعيت ايشله­دن بير آدی لهجه سانير. تانينميش شاه آديندا "بؤرکو ياريق" کيمی ايشله­نن, خالقين مثل­لريندن آيريلمايان (بيری­نين باشينا بؤرک قويماق! دده­سی­نين بؤرکون گئيمک! بؤرکو باشا قويان گرک بؤرکونه ده بير ياراشا . . . .کيمی) بير سؤزو کيم بيزيم بئينيميزه لهجه آديندا يئرلشديرير. سونرا قتلينه فرمان وئرير.   ديل بئله­جه آنلانيلا بيلمـَز! بيزه باخ! ديلين استاندارد شيوه­سينه (standard variety) مودئرن ديلچی­ليکده بيز هله "ادبی ديل" دئييريک. فارس­لار يئنه "زبان نوشتاری" دئمک­له بيزدن بير آدديم قاباق ديرلار.