"ايستگاه" سؤزجويونون يئرينه نه ايشله­نه بيلر؟ ايکی دليله گؤره بو سورغونون جاوابی وئريلمه­لی دير: 1. "آواوا" رومانی چاپدان چيخاندان سونرا دفعه­لرله سوروشوبلار: "نيـيه داياناق سؤزو ايشله­نيب؟" 2. نظره گلير گنج يازارلاريميزين بير پاراسی "دوراق" سؤزجويونو تورکيه­دن گؤتوردوکده قاتار ايستگاهينا دا ايشله­ديرلر. بير پاراسی دا آذربايجان جومهوريتينده تزه­ليکده تاپيلان "داياناجاق" سؤزونو هرهانسی بير نؤوع ايستگاه ديرسا ايشله­ديرلر. بو ساياق فرق­سيز اولان آد قويمانين اساس دليلی ده فارس ديلينده "ايستگاه" سؤزجويونون ايسترسه قاتار ايسترسه ده اوتوبوس دوران نؤقطه­يه فرق­سيز دئييلديـيينه قاييدير. حالبوکی بونلار فرق­لی ديرلر.     دوراق, داياناق, داياناجاق. . . هانسی؟ "دوراق" تورکيه­ده اوتوبوس ايستگاهينا دئييلير. "داياناجاق" تزه­ليکده آذربايجان جومهوريتينده ايستگاها دئييلير. "داياناق"-ی من رومان­لاريمدا قاتار ايستگاه­لارينا ايشلتميشم.   دونيانين _دئمک اولار_ چوخلو اؤلکه­لرينده "ايستگاه" ايکی دسته­يه بؤلونور: 1. دامداشلی, تأسيساتلی ايستگاه (قاتار ايستگاهی کيمی), 2. دامداش­سيز, تأسيسات­سيز ايستگاه (اوتوبوس دوران يئر کيمی). اونون­چون ده بو ايکی يئره ايکی فرق­لی اولان آد وئريلير, ميثال اوچون اينگيليس ديلينده قاتار ايستگاهينا استئيشن (station) و اوتوبوس دوران نؤقطه­يه ايسه stop (bus stop) دئييليير. تورکيه­ده ده بئله دير. اوردا اوتوبوس دوران نؤقطه­يه "دوراق", قاتار دوران يئره ايسه "ايستاسيون" دئييلير. من ده رومان­لاريمدا "دوراق"-ی اولدوغو کيمی اوتوبوس ايستگاهينا, "داياناق"-ی دا قاتار ايستگاهينا ايشلتميشم. منجه تورکيه­لی­لر قورولوش باخيميندان دوزگون داورانيبلار؛ يعنی "دوراجاق" يئرينه "دوراق" ايشلتمک­له سؤزجويو ييغجام فورمادا قوروبلار. بو ايش "داياناق" موريدينده ده بئله اولمالی دير؛ يعنی "داياناجاق" يوخ بلکه "داياناق" اولمالی دير. من ده بو ايشی گؤرموشم. ديلده گؤزو باغلی تقليدچی­ليک دوز ساييلان ايش دئييل. من بيلن بو دير!