سوروشولان بير سورغويا جاواب

"هوٍنـَر" يوخسا "صنعت"؟

"هوٍنـَرمن" يوخسا "صنعتکار"؟

فارس ديلينده "هنر" سؤزجويو بئله معنا و تفسير ائديلير:

هو = خوب = ياخشی

نر = ائرکک

هونر (نرِ خوب) = ياخشی ائرکک

گؤروندويو کيمی بو چوخ سطحی بير تفسير دير.

اينديسه, بو سؤزون معنا و تفسيرينی توٍرک ديلينده ايزله­يک:  

اوغلان­لار يئتگين­لنيب کيشی­ليـيه يئتـَن چاغدا اؤزلرينه آد قازانمالی اولارميشلار. اونون­چون ده, "ارليک" گؤسترمه­لی اولارميشلار. دئمه­ک, کيشی ساياغی بؤيوک بير ايش باشاسالمالی ايميشلار (مثلا دوشمن­له ساواشيب مئيداندان باشی اوجا چيخمالی ايميش, يا بؤيوک بير شيکار ائتمه­لی ايميش. . .) بئله­ليک­له "ارليک" (مردانگی) گؤسترمک­له "ار" (مرد) سانيلارميشلار. آذربايجاندا "ار" سؤزونون "شوهر" معناسی دا بو آنلاما قاييدير.

آنجاق بو "ار"-ليک گؤسترمکدن داها اوٍستون "هون­ار"-ليک ايميش _"هون"­لارين (هون ائلی)قودرت­لی اولدوقلاری اوچون. توٍرک ديلينده بئله دير:

هون + ار = هونـَر

(بو تفسيره داوود سعيدخانلی­لا من _ايکيميز ده_ راضيلاشيريق.)

"ـمن" يا "ـمان" اکی آرتيق تانينميش بير اک دير, فاعيل­ليک مفهوموندا. اونون­چون ده "هوٍنرمن" سؤزجويو چوخ طبيعی بير قورولوش دير. فارسجادا "هنرمند" کيمی ايشله­نير.

آرتيرمالی دير: "ـمن" يا "ـمان" اکی فارسجادا چوخلو "ـبان" فورموندا دا ايشله­نير؛ باغبان, نگهبان, دربان. . . حالبوکی, "بانيدن" فئعلی يوخدور. اونا گؤره ده, "ـمان" اکی­نين دَييشيلميش فورمو دير.

توٍرکجه­ده "باغمان" يازيلمالی دير و. . .

ايندی قضاوت ائدين: "صنعت" دئمه­لی­ييک يوخسا "هوٍنـَر"؛ يا دا آلاداغدان "صنعت" سؤزونو, بولاداغدان "ـکار" سؤزونو گتيريب يوووشدورماق­لا "صنعتکار" سؤزونو ايشلتمه­لی؟